قال الكاتب والسيناريست بلال فضل على حسابه الشخصى بموقع التواصل الاجتماعى تويتر: (أنا احترمت الخلفية الثورية لحمدين كتير بس واضح إنه مش قادر يسيطر على أنصاره ولذلك خلينا بقى نطلع الأرشيف طالما كله خسران يخسر بس على بينة).

وأضاف: (بعدين لما تطلبوا من أبوالفتوح ينتقد السلفيين اللي قرروا تأييده مابتطلبوش ليه من حمدين ينتقد مصطفى بكري اللي أيده ولابقى ثوري عظيم دلوقتي،وبعدين بتعايروا أبو الفتوح بإن مرجعيته حسن البنا على أساس إن اللي مرجعيته عبد الناصر يبقى عظمة.أمال حكم العسكر ده مين اللي بدعه أساسا).

وتابع: (الدستور كان بيطلع في ظروف أفقر من الكرامة وكنا بناخد فيه ملاليم وماكناش بنقبل إعلانات من ليبيا والعراق وكان بيبيع مئات الآلاف،لو حد جاب لي مقال لحمدين بيهاجم فيه معمر القذافي أو صدام حسين أعده بإعتذار رسمي في نفس المكان لحمدين.ولا هي الثورة حلوة على مبارك بس).

واستطرد: (بتموتني من الضحك حكاية إن حمدين أسهمه عليت.. لا أسهمه عليت ولا أبو الفتوح أسهمه عليت.. كل واحد مؤيدينه زي ماهما وتعالوا ننزل الشارع. خليكو صرحاء،وبعدين هو حزب الكرامة كان هيبقى ليه أعضاء في البرلمان أصلا لولا تحالف مع الإخوان بقوا الإخوان كخة دلوقتي، مانتكلم كلام معقول ولا إيه؟)

وأردف "فضل" قائلا: (هو لو كان حمدين ثوري جذري مبدأي ساب ليه عبد الحليم قنديل يمشي بضغط من الرئاسة ويقعد في البيت.مش ده حصل ولا أنا باعيد كتابة التاريخ قولوا لنا،لما كنت أنا وغيري بنروح النيابة بتهمة الإساءة للقذافي كان جرنان حمدين بياخد فلوس من الإعلانات دي.ده إسمه إيه.ثورية).

أحب أسمي الأمور بأسمائها المرشح الوحيد اللي متبني منهج ثوري جذري هو خالد علي.. غير كده أبو الفتوح زيه زي حمدين منهجهم ثوري إصلاحي.. الحق مايزعلشأنصار حمدين فجأة افتكروا أهمية التوحد وعدم تشميت الفلول فينا.طب ماكان من بدري.عموما أنا مش درويش لأبو الفتوح وباكتب أخطاءه دايما وراجعوني

واختتم: (تتهموا أبو الفتوح بالطبطبة على المجلس العسكري طب أنا أتحدى حمدين يقول الكلام اللي قاله خالد علي مثلا عن المجلس.نطلع الفيديوهات ولا إيه،اشمعنى أبو الفتوح اللي مش هيتخلص من خلفيته الإخوانية بينما حمدين هيتخلص تماما من خلفيته اللي كلها علاقات مع أنظمة صدام والقذافي والأسد كمان،هو لما أبو الفتوح يقول هاحاسب المشير والمجلس ولو طلع براءة هاستعين بيه يبقى عار ولما حمدين يقول باحترم شفيق وأقدره يبقى عظيم وثوري)! .