أكد الناشط السياسى وائل غنيم على صفحته الشخصية بموقع التواصل الاجتماعى "فيس بوك" أن فكرة ترشيد استهلاك الكهرباء فكرة مهمة لأن الحلول السريعة لمشاكل الكهرباء ليست موجودة، ولأن عدم ترشيد استهلاك الكهرباء سيتسبب في قطعها عن المنطقة بمجرد وصولها للحد الأقصى للاستخدام في أي لحظة.

وقال وائل غنيم مخاطبا: ترشيد استخدام الطاقة والمياه أساسًا هو واجب مجتمعي وإنساني بشكل عام والدول المتحضرة دائما بتعمل حملات توعية لده .. زائد إن أساسا ترشيد استهلاك الكهرباء بييجي بفايدة على الناس لأن الفاتورة هتكون أقل وبفايدة على الدولة اللي مش بتحتاج تبني مولدات كهربائية أكتر. ترشيد الاستهلاك مش معناه إن مثلا يبقى درجة الحرارة 40 وتقعد في الحر مفرهد .. بس ممكن يبقى معناه مثلا إن في ساعات الذروة والحر الشديد احرص إن ميكونش فيه أجهزة كهربائية كتير شغالة وإنت مش محتاجها أو مثلا تقدر تستخدمها في وقت تاني (مثال الغسالة أو المكواة) .. وإن الأوضة اللي انت فيها ومفتوح فيها التكييف مقفولة كويس عشان الهواء البارد يفضل لأطول مدة ودرجة حرارة التكييف مش لازم تبقى 18 .. ومتسيبش أوضة التكيف فيها مفتوح ومحدش قاعد فيها (متستغربش عشان ده بيحصل كتير في بيوتنا بشكل يومي) .. وإن كل الإنارة في البيت تعتمد على اللمبات الموفرة للطاقة وبرضه مفيش لمبة منورة بدون الحاجة لذلك .. وإنك تفصل الأجهزة عن الكهرباء بعد استخدامها ومتسيبهاش في الـ Stand By(اللمبة الحمرا) .. وإنك تقفل السخان الكهرباء في الأوقات اللي مش بتستخدمه فيها .. ومش لازم يا سيدي تلبس قطن لو بيضايقك الموضوع ده) ... فيه ناس بتعتبر النصائح دي تافهة ومش بتأثر .. بس فكرة التوفير الجمعي بيعمل فرق كبير .. لو مليون بيت في مصر التزموا بالنصائح دي مفيش كهرباء هتقطع طول الصيف في أي مكان.