فى مسلسل متكرر من ثورات الربيع العربى، اشتعلت الحرب النفسية على موقعي التواصل الاجتماعي "فيس بوك" و"تويتر"، وذلك في أعقاب الانتفاضة التي بدأها الآلاف من الشعب اليوناني فجر اليوم، وقاموا بحرق العديد من المبانى الحيوية، والاشتباك مع قوات الأمن.

وجاءت أبرز التعليقات في موقعي "فيس بوك" و"تويتر" على النحو التالى:

-عاجل، اللجان الشعبية في ميدان زيوس تلقي القبض على جاسوس من جزر الملاديف وبحوزته عملات أجنبية وموبايل بكاميرا، وقد أفادت الأنباء الواردة من أثينا وجود وجبات كنتاكي توزع على المتظاهرين شارع كوستا وخوليو.

-النهارده فى اليونان احتلوا وزارة المالية والقوى العاملة والتليفزيون ورموا مولوتوف علي الأمن وولعوا في المباني، ومفيش ولا حد مات، فين الخرطوش والقناصة والرصاص الحى !؟ حاجه غريبة اليونان دي دولة متخلفة ولا إيه !؟

-بس للأمانة تامر بتاع اليونان ظهر فى التليفزيون هناك، وقال انه اتدرب فى مصر ولقوا مع ناس جنيهات مصرية

ـ وفى رسالة لشباب 6 أبريل .. قال أحد المُعلقين : بصراحة التدريب فى صربيا مش جايب همه، احنا المرة الجاية إن شاء الله نتدرب فى اليونان بقى.

 عاجل .. اليونان: حزب الكنبوس يدعو إلى مسيرة تأييد للمجلسوس العسكريوس في ميدانوس العباسيوس.

 ـ نداء عاجل للسيد الراجل اللي ورا عمر سليمان عندك طالعة لليونان

- اليونان أنباء عن انسحاب جماعى للشرطة ، بعد اعتدءات ثوار اليونان عليهم.

- شكلهم بيذاكروا من كتاب سلاح العادلي.

- الطرف التالت جاله عقد احتراف في اليونان.

ـ نصيحة لثوار اليونان:  لو عندكوا مركز طبى عالمى ياريت تولعو فيه حااالا.

ـ عااجل.. الفناان تاامر خووسني.. تم ضربه في ميداان التخرير.. ويبكي ويقوول ..والله مش أناا دوول خماا اللي خالولي أخمل كده

ـ الرئيس اليوناني يلقي خطابًا استعطافيًا بعد قليل، ومجموعة إحنا أسفين ياكوستا في ميدان مفيستو محمود في مهندسين اليونان

ـ  شفيق هو رئيس الوزراء المنتظر في اليونان غدًا.