تأثرًا بأحداث ثورة 25 يناير وما تبعتها من أحداث واضطرابات، احتفل نشطاء المواقع الاجتماعية "فيس بوك" و"تويتر" بعيد الحب "الفلانتين" على طريقتهم الخاصة، حيث تأثرت تعليقاتهم فيما بينهم بالأحداث والتوترات التى عانوا منها أثناء الاضطرابات التى مرت بها البلاد أيام الثورة، فجاءت تعليقاتهم كالتالى:

ـ تشربي حاجة يا حبيبتي؟ .. آه ياريت إزازة مولوتوف بس تكون ساقعة

ـ فاكرة رعشة إيديكى في إيديا .. واحنا بنجري من الشرطة العسكرية

ـ السينجل اللي على حق يقول للورد و الدبدوب لأ

ـ هو: بحبك بعدد اللي انتخبوا الحرية والعدالة .. هي: بحبك بعدد اللي قالوا نعم على التعديلات الدستورية

ـ حمزاوي: أطالب بجعل الفلانتين عطلة رسمية، الكتاتني: لا تزايد يا أخ حمزاوي فأنت لست أكثر منا رومانسية

ـ بحبك بعدد لجان تقصي الحقائق

ـ بحبك أكتر من حب الملثم لمواسير الغاز

ـ هى: فين الهدية؟ ...هو: أنا عامل إضراب

ـ حبنا مفيش لايحة تقدر توصفه

ـ  إن شاء الله حنتجوز ونجيب أحلى ولد و بنت ونسميهم خرطوشة و مطاطي

ـ أنا وحبيبتي "مصريين أحرار" وبنعمل كل اللي عايزينة فـ "النور"

ـ الحب في زمن الغاز

ـ  بكره اشتغل وأجبلك خيمة فى الميدان بتبص على الصينية وجنب المترو

ـ أنا ملتزم بأقصى درجات ضبط النفس رغم كل اللي بتعمليه

ـ بحبك حب الثوار للميدان .. وحب الإخوان للبرلمان

ـ الحب الحب...مولوتوف مولوتوف

ـ اقتليني.. قتلي ما هيعيد علاقتنا تاني بكتب بقلمي ورقة عرفي على حد تاني

ـ هبنى "جدار عازل" حوالين حبنا.