صورة أرشيفية
طبعا كلنا عارفين ان التجاعيد هى العدو الاول لأى ست او بنوتة يادوب عدت سن ال30 بتبتدى تقلق من الخطوط اللى بتتعمق بعد كدة وتسبب تجاعيد لو اهملناها
عشان كدة انا بنصح باننا نهتم بالخطوط الفيعة ونعالجها قبل ما نوصل لمرحلة التجاعيد اللى لا يمكن علاجها الا بتدخل جراحى او بحقن البوتوكس والكولاجين ودة هنتكلم عنة باستفاضة فيما بعد بس اولا لازم نتعرف على الاسباب الرءيسية اللى بتسبب تجاعيد وخصوصا في سن مبكر
يعتبر من اهم اسباب التجاعيد في سن مبكر هو نقص الفيتامينات والبروتينات في الجسم مثل فيتامين ب المركب ب1 وب6 وب12 ودة بيأدى لجفاف الجلد وتكون التجاعيد والفيتامينات دى بنلاقيها في المكسرات زى البندق واللوز والخميرة بشكل كبير علشان كدة انا بنصح دايما بتناول حوالى 10 حبات من المكسرات يوميا وخصوصا اللوز لحماية البشرة من التجاعيد . فضلا طبعا عن اسباب تانية زى التعرض للشمس باستمرار والتدخين لأن النيكوتين بيسد اوعية البشرة الدموية فبيمنع وصول الترطيب الازم للبشرة وفي بعض انواع التقشير او الاسكراب بيسبب التجاعيد لأنة بينشف البشرة وعشان كدة لازم تستخدمى مرطب قوى جدا وخاص بنوع بشرتك بعد عمليات التقشير المتتالى للبشرة وخصوصا التقشير الكيمياءي
الماسك اللى انا هكتبة دلوقت بيساعد بشكل كبير جدا في اخفاء الخطوط الفورى واخفاء التجاعيد بالاستمرار علية كل اسبوع بالاضافة انة بيفتح البشرة وبيشدها وخصوصا قبل الماكياج او بعد عمل الاسكراب
انا بنصح بية بعد التلاتين للتخلص من الخطوط وتأخر التجاعيد بشكل كبير جدا
الماسك عبارة عن
بياض بيضة
2 ملعقة شمع العسل
ملعقة كبيرة نشا ولو البشرة حساسة يبقي كفاية نص معلقة نشا
يذاب شمع العسل بواسطة حمام ماء ساخن ويخلط مع بياض البيضة والنشا ويوضع على الوجة والرقبة حتى يجف ويزال بالماء الدافيء
والنتيجة هتبان من اول استخدام
